Samarqand shahrida mamlakatimiz talaba-yoshlarining “Talabalar bahori-2008” festivali nihoyasiga yetdi. “Yoshlar yili” Davlat dasturi doirasida o‘tkazilgan mazkur anjumanda yurtimizdagi oliy o‘quv yurtlarida tahsil olayotgan 200 nafardan ziyod faol, tashabbuskor, iqtidorli yigit-qizlar ishtirok etdi.

Mamlakatimizda Prezident Islom Karimov tashabbusi bilan yosh avlodning zamon talablari darajasida ta’lim-tarbiya olishi, fan, ta’lim, madaniyat va sport sohalarida o’z iqtidor va salohiyatini ro’yobga chiqarishi uchun barcha shart-sharoit yaratib berilmoqda. Bu yuksak e’tibor va g’amxo’rlik samarasi o’laroq, yoshlarning mamlakatimiz taraqqiyotida, ijtimoiy-iqtisodiy, madaniy hayotidagi ishtiroki tobora kengayib bormoqda. Mazkur festival yurtimizda har tomonlama yetuk, zukko va bilimli yoshlar kamol topayotganini yana bir karra namoyish etdi.

“Festival dasturida belgilangan barcha tadbirlar yuqori saviyada o’tdi, – deydi “Kamolot” yoshlar ijtimoiy harakati markaziy kengashi matbuot kotibi Jamshid Nosirov. – Ikkita ilmiy-amaliy anjuman, iqtidorli talabalar tanlovining mamlakat bosqichi, sport musobaqalari, “Nihol-2008” talabalar teatr tomoshalari o’ta sermazmun, qiziqarli ruhda kechdi”.

Festival doirasidagi ko’ngilochar, ma’naviy-ma’rifiy tadbirlar unutilmas taassurotlarga boy bo’ldi. Ayniqsa, “Quvnoqlar va zukkolar” ko’rik-tanlovi barchada katta qiziqish uyg’otdi. Unda Farg’ona politexnika institutining “Farpinator”, Toshkent davlat pedagogika universitetining “A’lo”, Toshkent to’qimachilik va yengil sanoat institutining “Dizayn” hamda Samarqand davlat arxitektura va qurilish institutining “Maroqandlik bojalar” jamoalari o’zaro kuch sinashdi.

Uch kun davomida festival ishtirokchilari Samarqanddagi oliy o’quv yurtlari, yoshlar hayoti va faoliyati bilan yaqindan tanishdilar, yangi do’stlar orttirdilar, ilmiy va ijodiy hamkorlik qilish bo’yicha tengdoshlari bilan kelishib oldilar.

“Bu festivaldan olgan taassurotlar xotiramizda bir umr muhrlanib qoladi, – deydi Termiz davlat universiteti talabasi G‘ulom Himmatov. – Anjuman mamlakatimiz yoshlarini Vatan ravnaqi, yurt kelajagi yo’lida birlashtirishda muhim o’rin tutadi”.

Festivalning yopilish marosimida ilmiy-amaliy anjumanlar, tanlov va boshqa tadbirlarda faol ishtirok etgan talabalarga esdalik sovg’alari topshirildi. Taniqli san’atkorlar ijrosidagi konsert dasturi namoyish etildi.

manba:uza.uz