O‘sib kelayotgan yosh avlodning puxta bilim, yuksak ma’naviyat sohiblari bo‘lib kamol topishida gazeta va jurnallarning o‘rni beqiyos. Shu bois mamlakatimizda bolalar matbuotini yanada rivojlantirish borasida keng ko‘lamli ishlar amalga oshirilmoqda.

Poytaxtimizning G‘afur G‘ulom nomidagi madaniyat va istirohat bog‘ida “Gulxan” jurnali hamda “Tong yulduzi” gazetasi tahririyatlari tomonidan tashkil etilgan “Bolalar nashrlari bayrami”da shular alohida ta’kidlandi.

Mamlakatimizda Prezidentimiz Islom Karimov rahnamoligida yosh avlodning ma’naviy olamini bolalikdan ezgu g‘oyalar asosida shakllantirish, ularga puxta ta’lim-tarbiya berish, intellektual salohiyatini oshirish masalasiga alohida e’tibor qaratilayotir. Bunday ezgu vazifalarni hayotga tatbiq etishda bolalar matbuotining o‘rni alohida.

Mazkur ikki nashr o‘zining rang-barangligi, zamon talablari darajasidagi dizayni, ezgulikka chorlaydigan materiallari bilan bolalar e’tiborini qozonmoqda.

Bayram tadbirida bolalar ijrosida kuy-qo‘shiqlar, teatrlashtirilgan tomoshalar namoyish etildi, mushoira, sport musobaqalari hamda o‘yinlar o‘tkazildi.

O‘zA