“Yoshlik” talabalar shaharchasida respublika Xotin-qizlar qo‘mitasi tomonidan tashkil etilgan uy mehnati bilan shug‘ullanayotgan ayollar tayyorlagan mahsulotlarning “Qo‘li guldir o‘zbek ayolin…” deb nomlangan ko‘rgazma-savdosi ish boshladi.

Tadbirkorlik faoliyatini boshlagan ayollarning kasb mahoratini oshirish, ular tayyorlagan buyumlarni keng targ‘ib etish, xususiy tadbirkorlik va kichik biznesni, milliy mahsulotlar ishlab chiqish asosida hududlarga xos urf-odat va qadriyatlarni rivojlantirish maqsadida tashkil etilgan ko‘rgazmada o‘ttiz nafardan ziyod xotin-qiz o‘z mahsulotlari bilan ishtirok etmoqda.

Ko‘rgazma-savdoda talabalarning ehtiyojiga mos mahsulotlar, milliy matolar, uy-ro‘zg‘or buyumlari xaridorlar e’tiboriga havola etilgan. Ko‘rgazma qatnashchilari tomonidan talaba-yoshlar uchun turli yo‘nalishlardagi kasb-hunarlar bo‘yicha amaliy mashg‘ulotlar o‘tkazilmoqda.

O‘zbekiston Xotin-qizlar qo‘mitasidan olingan ma’lumotlarga qaraganda, mazkur ko‘rgazma-savdo orqali ikki yuz million so‘mlikdan ortiq mahsulot sotilib, yuz million so‘mlikka yaqin buyurtmalar qabul qilingan.

O‘zA