Har bir yilga muayyan nom berish mamlakatimizda yaxshi an’anaga aylanib qoldi. 2008 yil Yurtboshimiz tomonidan "Yoshlar yili" deb e’lon qilinishi Respublikamizning barcha hududlaridagi yoshlarni to’lqinlantirib, kirib kelayotgan yangi yilga katta umid va ishonchlarni taqdim etdi.

Darhaqiqat, hech bir mamlakatda bizning O’zbekistonimizdagidek yoshlar istiqboli uchun bu darajada katta e’tibor berilmaydi. Davlat byudjetining asosiy qismi kadrlar tayyorlash milliy dasturi ijrosiga ajratilayotgani, maktablar, kasb-hunar kollejlari, oliy o’quv yurtlari yoshlari uchun eng zamonaviy orggexnika jihozlari bilan ta’minlangan binolar ajratilgani, yoshlar istalgan xorijiy mamlakatlarda bilim olish imkoniyatiga ega bo’layotgani ana shu g’amxo’rliklarning yorqin ifodasidir.

Prezidentimizning 2008 yilni Yoshlar yili deb e’lon qilgani ham chuqur ramziy ma’noga ega. Chunki yoshlar – mamlakatimiz kelajagi, xalqimizning tayanchi va suyanchidir. Yoshlarning hayotiy ustuvor qarashlari va ijtimoiy nuqtai nazari, ularning yangi demokratik jamiyat barpo etishdagi o‘z o‘rnini anglashi bu borada muhim ahamiyat kasb etadi. Davlatimiz yoshlarni har tomonlama qo‘llab-quvvatlash, ularning iste’dodini namoyon etishi uchun barcha shart-sharoitlarni yaratib bermoqda. Shubhasiz, kelayotgan yangi yil ushbu xayrli ishlarni amalga oshirishda yangi, yuqori bosqich bo‘ladi. Prezidentimiz ta’kidlaganidek, bugungi va ertangi kunimizning hal qiluvchi kuchi bo‘lgan yoshlarni tarbiyalash, ularning bilim va kasb egallashi, hayotda o‘zining munosib o‘rnini topishiga erishish davlat siyosati darajasidagi ustuvor masalalardan biridir.