Respublika Olimpiya zaxiralari tennis maktabi kortlarida dunyoning yigirmaga yaqin davlatidan kelgan raketka ustalari ishtirokida o‘tkazilayotgan “Toshkent Chellenjer – 2009” xalqaro turniri hal qiluvchi pallaga kirdi.

O‘zbekistonning eng kuchli tennischisi Denis Istomin ikkinchi bosqichda qozog‘istonlik Yuriy Shukinni 3:6, 6:1, 6:3 hisobida mag‘lubiyatga uchratib, chorak finalga yo‘lllanma oldi. Denisning keyingi bosqichdagi raqibi – o‘z hamyurti Konstantin Kravchukni 6:1, 6:4 hisobida dog‘da qoldirgan ukrainalik Sergey Staxovskiy bo‘ladi.

Yakkaliklar bahsida, shuningdek, slovakiyalik Lukash Latsko hamyurtimiz Arsen Asanovni 6:0, 6:1, belgiyalik Kristof Roxus moldovalik Andrey Gorbanni 7:6, 6:3 hisobida mag‘lubiyatga uchratdi.

Juftliklar bellashuvida ham o‘zbekistonlik tennischilar muxlisu mutaxassislar ishonchini oqlamoqda. Denis Istomin va Murod Inoyatov dueti yarim finalda hindistonlik Rohan Bopanna va Xitoy Taypeyi vakili Yen Sun Lu ustidan 3:6, 6:1, 10:5 hisobida zafar quchdi va birinchi bo‘lib finalga yo‘llanma oldi. Hozircha, yana bir juftlik – Rifat Biktyakov va Sarvar Ikromovda ham finalga chiqish imkoniyati bor. Ular chorak finalda ukrainalik Sergey Bubka va Sergey Staxovskiyni 6:4, 6:4 hisobida yengdi. Endi yarim finalda slovakiyalik Lukash Latsko va chexiyalik Yiri Krkoshka bilan bellashadi.

O‘zA